Ангелiна Дабравольская

ВЕРШЫ ПРА ВЕРШЫ (18.07.2005 г.)

ЗМЕСТ:


* Не нотамi, не словамi...
* Мой верш - ручны звярок
* Вершы...
* Дзецi i вершы
* Сцерпiць...
* Прысвячэнне верша...
* Верш-сняжынка
* Gutta cavat lapidem
* Хочацца...
* Сiмволiка...
* Iронiя i сур’ёзнасць
* * *
* Маленне



ВЕРШЫ ПРА ВЕРШЫ

(18.07.2005 г.)



*

Не нотамі,
не словамі,
не думкай –
а нечым
няўлоўным і прыгожым
я занатоўваю іх,
ды ўсё ж...

Ядро-зернятка
у шалупінні думкі
ахутана святлом
і таямніцай...

Ці прарасце?
У душы чыёй?..

Каб потым –

асобна,
незалежна
ад мяне...

Мой кожны верш
жыццём сваім
жыве.



*

Мой верш –
ручны звярок –
не хоча вяртацца
ў клетку літараў



*

Вершы –
пырскі
напоўненага да краёў
сэрца.



*

Дзеці
бываюць блізнятамі,
вершы –
ніколі...


*

...Сцерпіць усё папера,
ды не крытык...


*

...Прысвячэнне верша,
як абяцанне –
майго мінулага –
в а м


*

Верш-
сняжынка
растаў...

Адно –
на паперы
пляма...


*

Gutta cavat lapidem

Кроплі-вершы
точаць
камень сэрца


*

Хочацца быць
мудрэйшаю –
за саму сябе...


*

Сімволіка
не ў лічбах –
у жыццi
!!!...........


*

Іронія –
шлях
да разумення,
сур’ёзнасць –
да шчасця.


*

...Па кладцы-суму
пераходзіш
рэчку жыцця...

А раптам
сарвешся?!...



МАЛЕННЕ


...Птушкам –
крылы,
Кветкам –
пялёсткі...

Божа,
дай сілы –
веры –
і ўзнёсласці...



© Copyright: Ангелiна Добровольская, 2009
© Copyright: angel-dobro, 2009